政情:白鴿貼港鐵車門 網民狂插

港鐵過去曾被指無理或選擇性拒絕接收一啲有政治性嘅車站或車廂廣告,但近日就有人發現白鴿黨成功突破封鎖,喺部分港鐵列車車門賣廣告。不過,呢批廣告畀網民質疑係白鴿黨「投共鳥」嘅鐵證,並揶揄個廣告有鼓勵市民違法衝閘之嫌。

呢個廣告以海報形式出現,大大隻字寫住「衝破」,但唔知情嘅或會以為該黨教唆港鐵乘客衝閘。廣告迅速引來網民圍攻,質疑該黨「無啦啦有錢落地鐵廣告,話無條大陸大水喉照住都無人信」,激起佢哋投票畀白鴿黨對手嘅衝動!

白鴿黨中人解釋,其實佢哋只係喺港鐵荃灣線嘅其中一部列車落廣告,為期兩星期,唔係大家想像中使咁多錢,又話可能因為個廣告內容冇鬧政府及冇提選舉,先至過到港鐵嗰關。港鐵就指有關廣告係由外判代理商承辦,只要唔涉及違法、滋擾乘客、引起公眾不安、以及唔會令人覺得港鐵支持有關組織,即使有政治成分都冇問題喎!

「Money18免費即秒股票報價網站」現推出8升級功能,財經資訊,實時實發!