中環出更：施榮忻九月註冊結婚
九月政商界喜事多，卓妮尋日路經婚姻註冊處，發現過去曾有一段婚姻嘅百仁基金主席施榮忻（Jaime），再度入紙申請結婚，同女友鄧慧琦（Jaymee）註冊。其實佢哋兩人去年六月已喺外國註冊，所以Jaime話今次簽紙只係補番手續，唔會大排筵席喎。
Jaime婚期定於九月廿五日，新娘子希望儀式從簡，將邀請律師去佢哋屋企證婚，雙方家長及至親亦會到齊。Jaime話，註冊與否只係形式，佢同女友早以「老公老婆」相稱，並育有一歲多細女曉渝，佢又發表愛的宣言，話感謝女友對佢好遷就，希望兩人白頭偕老。