政情：黑英：倫敦暴亂警惕香港
倫敦連續多天發生暴亂搶掠，太平不再，身在香港嘅天文台前台長「黑英」林超英都為之驚訝，早兩日佢喺網誌撰文，慨嘆倫敦表面風光，實情貧富懸殊十分嚴重，民怨沸騰。呢一點正正同香港當前狀況似到十足十，「黑英」擔心香江隨時成為暴亂翻版。
崇商民不聊生
「黑英」四十年前曾喺倫敦生活一年，覺得當地直情係一個君子國。近年佢重遊舊地，踏實感覺不復再。「黑英」分析話，英政府走崇商路線，經濟係得到改善，但隨之而來物價飛升，民不聊生，年輕一代苦無出路，變成不務正業的滋事分子，於是促成今次上街搶掠手機、電腦嘅暴亂事件。
紅燈亮起，「黑英」話唔係偶然，明言倫敦事件對香港係一個警惕。佢直指回歸後香港表面歌舞昇平，但貧富懸殊加劇，專業人士搵食艱難，無暇管教子女，好易養出像倫敦一樣，眼中只有錢，沒有道德規範的下一代。呢番話，認真發人深省，唔知特區政府聽唔聽得入耳！