慘死港人冤未雪　黑色警示不應撤

菲律賓政府聲稱，人質事件發生一周年，當地已經採取改善措施，加強旅遊景點嘅警力，又對失職官員作出連串懲處，滿足晒港府同死者家屬要求，而且總統阿基諾三世已多次道歉，所以港府應該解除對當地嘅黑色旅遊警示咁話。

係咪好好笑呢？喂，各位菲國高官，你哋都識講啦，慘劇都過咗一年嘞，但係八位死得不明不白嘅港人至今仍然沉冤未雪，原因正正就係你哋唔肯合作、唔肯認錯、唔肯賠償。香港人未討回公道，就算去菲律賓，都唔係去旅行散心，而係去搵你哋算帳啦！

菲政府厚顏，港府又點回應呢？保安局局長李少光係咁講嘅，如果有證據顯示，菲律賓當局保護遊客嘅措施有效，會再作檢討，包括睇吓旅行社領隊係咪有信心再帶菲律賓團。

嗱嗱嗱，港府唔係嚟真吖嘛？計功夫茶話齋，目前對菲律賓嘅黑色旅遊警示絕對唔除得，理由最少有兩個。第一，為咗港人嘅人身安全着想。即係咁，菲政府話喺旅遊景點加強咗警力啫，之但係特蠢部隊蠢到幾交關，全世界有目共睹，警力再多都係廢嘅。大吉利是講句吖，萬一再發生挾持遊客事件，菲警又係用錘仔麻繩進攻，又係用手指槍營救人質，慘劇咪隨時重演？

第二，為咗伸張正義，討回公道，黑色旅遊警示更加唔除得。嗱，慘劇發生後，菲律賓政府一直敷衍了事，所謂調查求求其其，只係搵幾個低級官員祭旗就算數，而嗰個三世祖總統嘅所謂道歉，更加係嬉皮笑臉，毫無誠意。所以咯喎，港府一定要堅持原則，絕對唔可以妥協！

咦，三世祖即將訪問中國，唔通想以南海問題要脅北京，逼港府解除黑色旅遊警示？無論點都好，協助遇難者家屬向菲政府追討賠償，港府責無旁貸，中央政府一樣唔可以袖手旁觀。既然三世祖一場嚟到咯喎，咁就啱嘞，不妨藉此機會向佢施壓，要求菲國政府畀香港人一個真真正正嘅交代。

一句講晒，慘死港人冤未雪，黑色警示不應撤。港人嘅鮮血唔能夠白流，人質慘劇真相一日未明，遇難者家屬一日未得到合理賠償，港人遊菲島一日仲心驚驚，黑色旅遊警示就一日都唔可以解除！