政情：唐唐又失言畀人鬧垃圾
警方喺國務院副總理李克強訪港期間作出嘅保安安排，被指過度擾民甚至侵犯人權自由，三位疑似特首候選人尋日群起為李克強、港府及警方保駕護航，其中經常講錯嘢嘅政務司司長唐英年再次失言，話保安安排侵犯人權自由嘅講法「完全係垃圾」，旋即畀網民揶揄佢連垃圾都不如，仲大翻佢恐嚇八十後「車毀人亡」等爆言論，今次真係擦鞋擦出禍！
李克強訪港兩日半，不但導致港九交通間歇性癱瘓，無數示威者遭警方粗暴打壓，甚至連大學生都唔放過，令港大百年嘅自主開放校譽毀於一旦。港大校長徐立之，尋日極速變臉會見學生補鑊，又將保安過嚴責任推畀警方。保安局局長李少光都唔敢死撐，話警方做法是否恰當係「見仁見智」。
不過，三位疑似特首候選人就一於「勇」字當頭，先後發言力撐，但就以唐唐撐得最核突。話說唐唐尋日出席婦協郭得勝服務中心開幕禮時，聲稱港府完全尊重傳媒嘅採訪自由，李克強訪港每一項活動都有安排採訪。但實情係李克強訪港只有少數活動有事先安排採訪，大部分都係傳媒自行追訪揭發，甚至等到完事後先發新聞稿同相片。
「畀佢做特首會點?!」
不過，當唐唐以英文答問題期間就忽然爆咗一句：「有關侵犯人權同言論自由嘅講法，完全係垃圾（Completely rubbish）！」不但令在場記者全部Ｏ晒嘴，更立即引發網民瘋狂留言討論及狠批，包括「咁荒謬都有，一舊垃圾講一堆垃圾」、「一個垃圾不如嘅廢物」、「平時又唔出聲，一出聲就挺中央」、「畀佢做特首會點？！」
唐唐呢句「完全係垃圾」嘅說話，肯定又會繼「有生之年見唔到失業率回落」、「嗰班友仔喺街度條條Fing」、「進一步強化貧富懸殊」及「車毀人亡」之後，成為佢嘅另一註冊失言金句。
全國人大常委范徐麗泰就話理解警方保安安排，但被問及對於警方喺李克強訪問麗港城期間，拘捕一名身穿「六四」Ｔ恤嘅居民，佢就話着「六四」Ｔ恤係「有意識」，又話警方唔想領導人睇到呢啲嘢，係想畀對方一個好印象，係顧全大局嘅做法。不過，范太自言今次咁講肯定會畀人鬧，但始終都要講。
至於經常抽水嘅行政會議召集人梁振英，尋日晨早就接受電台訪問，話警方會根據情報作出保安安排，佢相信警方嘅判斷能力喎。莫非佢收到風，顯示李克強來港會遭到恐怖襲擊？