中環出更：名媛撐婦協 逼爆鵝頸橋
尋日下午約三點，過百名盛裝打扮嘅城中名媛靚太齊集鵝頸橋底，但唔係約埋打小人，而係同賀「香港婦協郭得勝服務中心」隆重開幕，現場衣香鬢影，將中心擠得水洩不通。捐助中心重建嘅新鴻基地產郭氏家族，由身為長子嘅非執董郭炳湘及太太郭李天穎（Wendy）出面招呼賓客，好多老友百忙之中抽空去撐場，難怪兩夫婦好似辦喜事咁，愈忙愈開心。
郭太包陪慶好好傾
婦協名譽會長蔡李惠莉，一身貴氣打扮去打氣。佢話暑假就嚟結束，但係今年冇同家人出外遊埠，事關全家只得佢有暑假放，因為佢係安基司幼稚園嘅創辦人兼校監囉！卓妮轉頭又見到中華總商會會長蔡冠深太太蔡關穎琴，佢手挽新加坡名牌KWANPEN最新款紫色手袋，同身上嘅紫色花裙極之相襯，令人賞心悅目。已故一代船王包玉剛嘅長女包陪慶都現身，佢同Wendy有傾有講，感情好好。
尋日係女士嘅世界，男士只能企埋一邊。卓妮發現一張後生面孔，就係香港青年聯會主席葉振都，原來佢嚟撐婦協主席林貝聿嘉，見到中心咁寬敞舒適，佢都話要鼓勵青聯嘅姊妹們多啲同婦協交流喎！