中環出更：孫玥美容護膚簡單就是美
曾被網民譽為球壇美人嘅前國家排球隊女將孫玥，無見一段時間後，尋日同幾位後輩一齊出席一間美容公司嘅宣傳活動。久違了嘅孫玥雖已為人母，但皮膚仍然白皙剔透，究竟佢有何護膚秘訣呢？孫玥話，佢喺呢方面無乜特別心得，只係得閒做吓Facial，隔個星期去一次美容院，就係如此簡單。
卓妮記得孫玥以前未退役時經常要集訓同出外比賽，咁忙又點樣護膚呢？佢話買定啲面膜定期敷吓就算，無謂行裝過多帶來負累，當時佢並肩作戰嘅隊員都係咁樣做。不過，孫玥話有樣嘢係不可或缺，就係要做防曬措施，事關佢好怕曬，只要喺太陽下曬十五分鐘，啲斑就走晒出嚟。孫玥又話，就算皮膚再好，仍然要為保持最佳嘅容顏而努力，所以佢要長期幫襯美容院持續做祛斑療程，愛美果然係女士嘅天性喎。
為餵母乳戒辣
咪以為孫玥淨係以前練習同比賽先至多損傷，原來湊女都一樣。孫玥囡囡何嘉琪已經九個月大，但就因為湊女搞到肌腱勞損，雙手手指經常有麻痹嘅感覺，呢啲苦楚，都係以前做運動員日夜操練未見過嘅。唔單止咁，本身嗜辣嘅孫玥，又因為餵母乳嘅關係而要戒辣。為愛女付出咁多，母愛嘅光輝令孫玥更加明艷照人。
卓妮