政情：長毛冇打呔赴晚宴被拒
平日不修邊幅嘅社民連立法會議員梁國雄（長毛），尋日獲邀出席會展舉行嘅「國務院副總理李克強各界歡迎晚宴」，佢滿心歡喜以為可以直接上書中央領導人，提出釋放內地維權人士，點知入到酒店門口，保安竟然唔畀佢進入，原因係請柬講明要着「正裝」，冇打呔嘅長毛自然唔入得。長毛同保安理論多次後，保安堅持要佢換番套正裝入場。
班兄弟都係着牛記笠記
不過，長毛未有放棄，即刻撲去附近示威區同社民連啲兄弟「借衫借呔」，點知佢啲兄弟都係T恤牛仔褲打扮，最後班兄弟就搵咗條手挽帶畀長毛當呔用。當時長毛求其打個結就衝入會場，但係最後都係衝關失敗，同李克強緣慳一面。
長毛話佢唔識上流社會禮節，又唔知乜嘢叫正裝，仲話上次前國家副主席曾慶紅訪港期間，佢都係着T恤老牛出席宴會，估唔到今次特登着件恤衫，竟然入唔到場，大嘆當權者只愛富貴人家，不喜平民百姓喎。