唔講唔知，原來港府高官好似鎢絲燈泡。
點解？係咁嘅，傳統鎢絲燈泡靠鎢絲發熱嚟發光，不過，成個過程相當敗家，發熱用咗九成電力，只有一成電力用於照明。再睇番港府高官吖，個個高薪厚祿，但係真正物有所值、可以為社會發熱發光嘅人睇怕一成都冇，你話嘞，佢哋係咪好似浪費地球資源嘅鎢絲燈泡？係咪一早應該被淘汰？
大家可能覺得奇怪，因乜事功夫茶將港府同燈泡混為一談，唔通十月施政報告臨近，煲呔曾又鬧出慳電膽醜聞？唔係，煲呔曾自私啫，唔係傻嘅，今次係港府搞搞新意思，想為環保做少少嘢，限制銷售能源效益較低嘅鎢絲燈泡喎。
根據諮詢文件，當局建議以立法方式分階段限制鎢絲燈泡供應，市民常用嘅家居燈泡同裝飾用燈泡都會受管制，部分未符合最低能源標準嘅鎢絲燈泡更加會被禁售。當局估計，有關計劃可以每年節省三億九千萬度電，以每度電平均一蚊計算，即全港每年可以慳番三億九千萬元電費。
節能省電係世界潮流，從環保角度講，港府要淘汰嘥電燈泡，大家梗係冇意見啦，其實，唔少國家早就立例禁用鎢絲燈泡，港府慢咗幾拍嘅喇。更弊嘅係，根據跛腳政府嘅施政往績，功夫茶不得不擔心，呢項環保新措施隨時又變成有姿勢無實際嘅環保騷，咁就真係嘥氣嘞！
嗱嗱嗱，唔係功夫茶對港產官僚有偏見呀，事實證明，港府每次大鑼大鼓推出環保新政，鋪鋪唔係虎頭蛇尾，就係雷大雨小，有時甚至擾民多過環保添，真係唔到你唔擔憂㗎。舉例講吖，港府搞藍天行動，結果阿崩叫狗，愈叫愈走，藍天白雲就冇嘞，烏煙瘴氣就多多都有；又例如停車熄匙，環保變擾民，法例最終慘被剝牙，有法例等於冇法例；而徵收膠袋稅就仲衰，爛尾收場自廢武功，變成益咗商家、苦咗用家嘅大笨策。
點解港府搞環保會咁失敗呢？鬼咩，港府搞環保，餐餐當做騷，目的只係為虛應民意，好似卡通人物頭頂突然出現一個發光電燈泡，「叮」一聲，諗到就做，完全唔經大腦，有乜可能唔搞到甩甩漏漏、擾民害民吖？
嗱，環保高官尸位素餐，佢哋享受高薪厚祿係咪浪費緊地球資源，功夫茶唔敢講，但有一樣好肯定，就係港府今次大鑼大鼓管制鎢絲燈泡，如果再以做騷心態嚟做，遲早又係好事變壞事，環保不成反擾民，到時就唔止對唔住香港人，更加對唔住全人類！