香港嘅選舉條例好嚴謹，如果要用任何標誌印喺選舉單張上，都要事前向選舉管理委員會登記，尋日憲報公布多咗七個政團及商會登記標誌，從中可以見到唔少選舉部署。其中一間登記嘅香港化妝品同業協會，曾經支持「假髮大王」趙振國出選立法會批發及零售界，但結果趙輸咗畀方剛，如今該會向選管會登記標誌，係咪暗示想再支持某人出選呢？
香港化妝品同業協會會長徐啟雄話，唔知該會登記咗標誌，但該會對選舉事務向來做足準備，至於會否再支持趙振國，佢話趙振國個屬會已經脫離咗該會。換言之，唔通係第三方勢力想進軍批發及零售界？我哋去該會網站睇過，發現佢哋有專頁叫會員登記做立法會批發及零售界別選民，連區議會都有，仲教埋會員點登記做選民，睇嚟佢哋對選舉相當進取，唔係一般商會咁簡單。
至於其他登記標誌嘅政團，包括同工聯會陳婉嫻關係密切嘅東九龍居民委員會，新成立無耐嘅人民力量、人民力量麥業成為主嘅「民主陣線」、「關懷香港」等，而自由黨早前轉咗新黨徽，所以都要重新登記。