政情：阿Paul為直選鋪路？
外籍家庭傭工爭取居港權問題，已經取代替補機制、雙普選，以至復建居屋等，成為十一月區議會選舉、甚至明年立法會選舉嘅最熱門議題。不過喺呢個問題企得最前又最快嘅，並非現任嘅立法會直選議員或區議員，而係來自旅遊界功能界別嘅律師謝偉俊（阿Paul），有人仲發現佢同其他人聯名喺地區派發反對外傭爭居權嘅單張。
據聞阿Paul並非有意染指區選，而係想喺下屆立法會轉戰地區直選，今次佢高調就外傭居權問題發聲，唔知係咪為明年直選鋪路呢？
本港現時約有十二萬五千名外傭連續居港超過七年，如果港府喺外傭居權官司中敗訴，佢哋有可能全部都享有申請居港權資格，連帶佢哋嘅配偶同子女，對香港嘅醫療、教育、房屋、社會福利、以至中產家庭嘅財政負擔都構成嚴重影響，自然引起廣大市民同選民嘅關注，亦成為各黨派候選人嘅重要選舉議題。
主攻港島區中產選票嘅新民黨主席葉劉淑儀，早前就力撐港府喺法院有判決之前提請人大釋法，唔擔心畀人話佢破壞司法獨立。但原來最先提出有關問題及建議嘅係阿Paul，晨早就喺網上成立咗個「關注外傭永久居留權關注社群」。有人最近仲喺紅磡區，發現一張由阿Paul同紅磡灣區議員張仁康聯名印製嘅反外傭居權單張，似乎唔止係純粹關注咁簡單。
白姐姐都有意參選
其實早前我哋已經聽到阿Paul有意轉戰直選，並搵咗幾位地區樁腳喺區選幫佢試票，而且港九新界都有，視乎區選結果再決定係咪參選同落邊個區選。消息更指除咗阿Paul本人，佢愛人白姐姐亦有意參選，而且參選意欲比阿Paul更強烈。事實上，兩人過往都曾經玩過直選，其中阿Paul喺二○○○年以「法律超人」形象參選過港島區，白姐姐就喺去年參加過九龍西立法會補選，雖然最終大敗而回，但由於形象同言論出位，至今仲有好多人記得。
我哋問過阿Paul，佢話直選一事言之尚早，但係就強調今次就外傭居權問題發聲，純粹係覺得官司影響好多香港人，同選舉完全無關喎。究竟係咪真係無關，遲啲自有分曉。