中環出更：陳晴孖羅寶文鬧市義賣月餅
下個月就係中秋節，應節月餅又開始熱賣，港人樂善好施，如果一邊食月餅一邊做善事就最好不過。聯合國兒童基金香港委員會尋日就喺銅鑼灣鬧市為一連三日嘅月餅義賣活動揭幕，主席陳晴（Judy）同富豪酒店太子女羅寶文無懼烈日當空，齊齊現身撐場，兩顆愛心實在令人感動。
愛心爆棚嘅Judy近期頻頻出動做善事，今次義賣係為咗支援聯合國兒童基金會嘅「非洲之角」緊急籌款項目，協助面臨六十年來最嚴重旱災嘅東非國家兒童籌款。Judy同羅寶文一向好老友，早前兩人傾閒偈時，諗到中秋節就到，不如搞個月餅義賣活動，即刻獲得寶文大方捐出六百盒富豪酒店嘅月餅參與義賣，善長只需捐出三百二十元，即可獲贈月餅一盒。
陳佐洱間中來港探乖孫
Judy話，今次富豪捐出嘅月餅價值約十八萬元，佢希望籌款愈多愈好，呼籲家長帶埋子女去做善事，順便畀香港嘅小朋友知道自己有幾幸福。
講起象徵團圓嘅中秋節，Judy暫時冇打算返北京探爸爸前港澳辦副主任陳佐洱，事關Judy嘅囝囝仲細，唔想搭咁長時間飛機折騰，所以要等BB大個啲先。咁外公咪好掛住外孫囉？Judy笑稱，爸爸身體好好，間唔中會來港探乖孫㗎！