政情:鄭慕智翻兜入航諮會

被稱為「公職王」嘅鄭慕智(Moses,圖),本身做律師已經夠晒忙,但佢對回饋社會仍然樂此不疲。政府尋日公布,委任Moses做航空發展諮詢委員會新成員。呢個安排表面上睇落冇乜嘢,但其實Moses今次係再作馮婦,重新出任呢個諮詢委員會成員,唔通佢有乜特殊技能,令政府非委任佢不可?

身兼多項公職

Moses○九年先卸任呢個委員會,今次重新披甲,唔知係咪同冇人肯幫夕陽政府有關呢?Moses現時身兼多項公職,包括教育統籌委員會主席、財務匯報局成員、前任行政長官及政府委任官員離職後工作諮詢委員會主席、離職公務員就業申請諮詢委員會主席,咁多公職,真係睇到頭暈。

雖然政府同Moses本身都冇違反政府委任公職嘅「六六指引」(最多擔任六項公職),但Moses同時身兼多項被政府唔當係公職嘅「公職」,好似港交所獨立非執行董事及馬灣公園諮詢委員會主席,上述兩個職位都同香港政府有直接關係,但由於性質唔同,所以唔計算喺「六六指引」之內。

Money18免費即秒股票報價網站現推出8升級功能,財經資訊,實時實發!