中環出更：顏吳餘英 憂玩具廠爆倒閉潮
全球大冧市，消費市道即時降溫，經營玩具生意嘅廠商會副會長顏吳餘英（Katherine）都大嘆生意難做，佢話人工、原料、化驗費等成本近年不斷上升，恐怕年底會爆發玩具廠倒閉潮。
Katherine經營玩具車，係業界中嘅奇葩，早前佢出席廠商會會董晚宴，都忍唔住大吐苦水。Katherine承認，內地廉價勞工時代不再，事關請人好困難，佢間玩具廠過去十個月內，人工成本增幅高達四成。更頭痕係，玩具出口往歐美講求安全標準，百物騰貴下，化驗費亦調升四至五成。
電子產品搶客
各樣成本係咁升，埋單計數，幾乎無錢賺。Katherine坦言，珠三角唔少港資玩具廠因為捱唔住，近月已陸續結業。她又對玩具業前景表示憂慮，事關時下年輕人趨向高科技電子產品，除非有電影或漫畫帶旺，否則傳統玩具未必賣錢。今個聖誕，玩具定單亦未見旺，Katherine擔心有更多玩具廠商捱唔過寒冬，被迫執笠。
卓妮