《蘋果日報》又涉嫌造假，該報尋日報道，指地區流傳小道消息，話一向以狙擊民主黨為己任嘅政團人民力量，喺嚟緊區議會選舉有意用銀彈招攬獨立人士，以獨立身份狙擊民主黨以及社民連。雖然人民力量主席劉嘉鴻已斷然否認，不過《蘋果》一於少理，篇報道繼續用「傳人民力量銀彈招死士」做標題。
人民力量尋晚發表聲明，強調喺來屆區議會選舉上，將為香港人提供保皇派同偽民主派（民主黨及民協）之外嘅第三選擇，佢哋對《蘋果》失實報道感到震驚，又指報道係志在造謠，有關報道手法絕對係香港傳媒界嘅恥辱，佢哋嚴厲譴責《蘋果》，又要求對方發出書面道歉，並於三天內喺報章同網站刊登澄清啟事，人民力量會保留採取法律行動嘅權利。
人民力量主席劉嘉鴻對《蘋果》嘅報道感到十分憤慨，又話完全估唔到咁強烈否認、對方又冇證冇據嘅情況下，篇報道都可以照出街，仲要起一條咁嘅標題，令到每個成員都覺得含冤受屈。