政情：黃至剛唱好大笨象
美國債務評級下調觸發全球股災，港股尋日繼續急挫，唔少名人亦成為「蟹民」。前馬會行政總裁黃至剛（Lawrence）尋日去香港會食晏時，就自爆揸咗唔少滙控，尋日股價跌至六十六元，見兩年新低，Lawrence就話未驚過。佢大派定心丸話，壞消息盡出後，相信股價會升番，唔使驚喎。滙控跌到咁平，Lawrence話買得過：「長揸一定無問題。」
工程師學會前會長梁廣灝都係滙控擁躉，長揸等收息，但近年都少買嘞。近日港股跌到散晒，梁生話唔驚就假，擔心美國爆煲後，歐洲都未必企得住腳，希望最壞時刻過去後，全球股市會重拾升浪。
保良局副主席鄭錦鐘都係股市大好友，睇見通街平貨，佢話心郁郁想掃貨，正盤算分段吸納，心水係具中國概念嘅內銀股或零售股，因為中國經濟仍然強勁，港股唔會差得去邊喎。