中環出更：黃宜弘買遊艇出海歎世界
中總代表黃宜弘（Philip）一向識飲識食，最近更有新遊艇落水添。卓妮最近就應邀參觀過Philip隻新遊艇，裏面真係一應俱全，又有酒窖又有大床，簡直係星級嘅享受。Philip話，呢隻叫雙贏（Win Win）嘅遊艇其實換咗無耐，因為之前裝修需時，船主反建議佢用住另外一隻遊艇，Philip無Say no，同船主協議有新遊艇後，就會以九折賣返隻舊嘅遊艇出去，Philip可以短時間有兩隻遊艇玩都咪話唔盞鬼，所以一有時間就帶埋老婆出海食海鮮，又潛水探索吓海洋生態，實在好寫意。
去南丫島食海鮮
尋日風和日麗，雙贏號載住Philip同一眾友人去南丫島名店天虹食海鮮，原來佢係呢度嘅熟客，Philip光臨唔止食物特別抵食夾大件，仲特別招呼佢享用一樓有冷氣嘅貴賓房，Philip尋日飲嘅唔係茅台，而係威士忌。
Philip買賣遊艇有一手，對於係唔係繼續參選下屆立法會就疑幻疑真。Philip起初話，依家表態係言之過早，而且要計選舉經費，唔可以話講就講，但一時又話有「新金王」稱號、全國政協委員黃英豪係合適人選，但未知對方係咪有意參選喎。