中環出更：施榮懷與蛇同眠嚇餐飽
廠商會副會長施榮懷（Irons）公職多，作為爸爸嘅想同仔女傾心事，都要花啲心思。Irons一家五口趁暑假跟團遊浮羅交怡，除咗可以共對五日，又可以親親大自然。點知佢哋入住嘅別墅傳出怪味，原來與蛇同眠咗兩晚，諗起都一額汗。
浮羅交怡出名水清沙幼，Irons把握機會釣魚，又坐船出海觀賞大鷹覓食，節目豐富。但好戲在後頭，話說旅行團安排佢哋入住別墅，連續兩個晚上，Irons同太太聞到一陣動物尿味。直至第三天，領隊突然通知，喺團友房間發現蛇皮，即係話有蛇出沒，安排團友馬上換地方，諗起自己與蛇同眠兩晚，都咪話唔驚。
爆大仔練緊大隻
Irons笑言平日應酬多，幾乎晚晚飲酒，去到浮羅交怡，可以戒酒五日，人都醒神啲。此外仲有另一收穫，就係收料。Irons兩位公子留學外國，好少機會黐爸爸，趁旅行時間，拉住老竇傾心事。爸爸又爆料話，大仔練緊大隻，秘訣係要日睡十二小時，又食營養餐谷肌肉，Irons講笑話：「佢日瞓十二粒鐘，我都係瞓得六粒鐘咋。」