公爵街兩邊施工 途人焗行馬路
「條路先得嗰二、三百呎長，但兩邊馬路都一齊掘路，逼到要行晒出馬路﹗」麥太指太子公爵街水務工程已展開多時，曾發現工人多次於同一位置施工，「掘完鋪好又再掘過」，質疑工程進度因而被拖延。
當區區議員陳景煌承認，接獲不同市民投訴區內水務工程施工時間過長，但「有啲地盤放喺度都冇人開工」，質疑外判商拖延工程進度，又促水務署加緊監督工程，「工程係判咗出去，但水務署都有責任跟得緊啲！」
水務署發言人表示，為減少工程對附近學校的滋擾，公爵街水務工程之承建商只能於學校假期進行工程，適逢附近學校亦有道路工程進行，令上址工程稍為延長，有關水務工程預計於今年九月完成。發言人又稱，工程期間需維持適當供水服務，故上址之重複掘路情況乃正常工序，當中不涉拖延竣工。