中環出更：龐愛蘭走進邊青世界
前傑出青年協會主席龐愛蘭（Scarlett）尋日非常忙碌，去完火炭派愛心湯水畀街坊，跟住又要趕入機場搭夜機去澳洲處理一件大事，事關佢十八歲大嘅兒子Andy喺升讀大學面試安排方面出咗問題，所以佢要趕過去同囝囝並肩作戰解決問題。
其實Scarlett除咗愛錫自己囝囝外，仲好關心其他年輕人，好似最近佢就出咗本新書叫《走進孩子的世界》，將二十二個年輕人重新振作嘅成長真實故事結集成書，當中有更生人士，亦有逃出毒海嘅年輕人。
Scarlett話，佢寫呢本書嘅時候好辛苦，經常出入監獄之餘，仲抽離唔到書中主角嘅世界，大家仲成為好友，好似有個女仔經常頭痛，但媽咪就唔信佢，最後Scarlett就帶咗個女仔去睇醫生，所以呢本書好啱家長睇，因為可以進入孩子嘅世界。
乖仔考大學遇阻滯
至於Scarlett，多年來都同囝囝以朋友形式相處，好似今次Andy考大學出問題，佢二話不說就飛過去，但囝囝好獨立，冇想過媽咪會過去陪佢，仲叫媽咪唔好嘥錢添！