外傭居港權司法覆核案件全城關注，有政黨估計一旦外傭勝訴，勢將即時推高本港失業率，並對香港帶來嚴重的中長期經濟壓力。夕陽政府亦不敢怠慢，連番放風話本周會開行會評估事件，終於安排到尋日早上開會，而傳媒一早就喺政府總部靜候政府宣布重大決定，點知夕陽政府「五時花，六時變」，特首辦突然通知一眾行會成員取消有關會議。
不過，政府消息人士堅稱尋日無行會要開，又無評論幾時會再開行會，真係唔知政府想點。事後有人估計，煲呔曾突然唔開行會，係同傳媒一早踢爆幾時開會有關；亦有人估計，政府內部仲未傾掂點樣拆解呢個政治炸彈，於是索性唔開會，費事喺班行會成員面前出醜喎。究竟邊個版本先係真，可能只有自詡係「政治家」嘅煲呔曾至知道喇！
老實講，市民已開始聚焦關心外傭居港權問題，煲呔曾最好盡快處理以釋除市民嘅疑慮，否則問題愈拖愈耐，只會製造出另一個政治炸彈，睇怕佢都好難做埋收尾嗰年任期。