政情：「鍾嘉欣」執陳偉業死雞
有「政壇鍾嘉欣」之稱嘅自由黨黨花歐銘絲（Rainbow），雖然出道日子尚淺，但係人氣就一啲都唔弱，據該黨中人話，Rainbow形象正面兼討好，最重要係有野心喺政壇大展拳腳，所以極有機會喺年底區議會出戰荃灣區議會麗興選區，即係人民力量立法會議員陳偉業（大舊）嘅區議會選區，睇嚟佢絕對唔係玩玩吓做花瓶嗰種。
出戰麗興選區
咪以為Rainbow咁夠膽去挑戰大舊呢個政壇老手，其實大舊一早就明示或暗示好大機會唔再參選，人民力量會派出一名年輕成員接棒參選，希望保得住個議席。消息人士透露，初步評估Rainbow當選機會都唔細，除咗冇大舊呢個勁敵外，最大原因係呢個選區已經重新劃界，範圍多咗深井部分地方。
據聞該黨副主席周梁淑怡喺深井有好多支持者，而且同當地商戶稔熟，相信可以拉到唔少票喎，但呢個係該黨嘅內部評估，最終結果當然要選過至知啦！