中環出更：棋哥囡囡返港誕B攞居權
唔少孕婦恨去外國生仔，為BB攞外國居留權。不過，全國政協常委陳永棋嘅千金Anna，就反其道而行，九月將由英國返港產女。棋哥話，理由好簡單：「攞居港權好過攞居英權！」
棋哥日前出席江蘇鹽城喺香港舉行嘅投資推介會，佢相當風騷，皆因佢準備喺九月抱孫，佢話BB女擇好良辰吉日，返香港出世。棋哥仲會飛英國，陪腹大便便嘅囡囡返港添。咁大陣仗，點解唔喺英國生呢？棋哥笑騎騎話：「今時今日，攞本特區護照，方便得多！」放棄居英權亦在所不計。連埋快將出世嘅外孫女，棋哥一共有四粒乖孫，名副其實兒孫滿堂。
話唔怕坐高鐵
溫州高鐵意外舉世震驚，棋哥都話係慘痛教訓。佢話去年到長沙公幹，因為錯過飛機航班，一度想坐高鐵返廣州，後來全國政協委員「深圳王」黃楚標得知，馬上出動私人飛機，載佢返香港，所以至今未坐過高鐵。咁依家仲敢唔敢坐呢？棋哥就話就算聽日要坐高鐵，一樣冇有怕喎。