公立醫院長期鬧人手荒，日前周一鑊又話，過去每年僅有約一千名新護士供應，今年將增加至一千四百名，明年會更多，故公立醫院護士人手不足的最艱難時期已過去云云。
周一鑊愛穿「國王的新衣」，又愛把市民當無知的井底蛙。眾所周知，近年公院流失的醫護人員多是經驗豐富的員工，一時間就算添加了新護士，也難即時紓緩人手壓力，何況流失非常嚴重！就如老朽收入增加，可惜天生大花筒，收入增一萬卻多花萬五，咁又點紓緩入不敷支嘅壓力？公院護士荒就係呢個道理。
政府推政策從來不經深思熟慮，市民吃一虧長一智，漸漸地，政府敲鑼打鼓賣回魂丹，市民嘅自然反應就係：政府又畀個氹你踩，又嚟打人荷包，搶得就搶！周一鑊硬銷自願醫保計劃反應冷淡，就係最佳證明。政府即使聲大夾膽粗話已預留五百億元作醫保承擔，可市民就唔信有咁大隻蛤乸隨街跳。為何政府唔把五百億撥入公立醫院？搞自願醫保計劃實質上係想甩身，懶理長期病患者死活。如此縮骨，安得不令市民大眾覺得政府推自願醫保，一如強積金的不濟，聽見就抑鬱想死。
周一鑊，有啲嘢唔係一加一就等於二。英超勁旅阿仙奴領隊雲格率隊訪問中國，期間接受媒體採訪時說：中國對我來說是個謎，我無法想像，中國這樣的人口大國，找不出十一位好球員。香港對老朽來說也是個謎，這樣一個大都會、金融中心，理應地靈人傑，可就是出不了一個懂得食物及衞生的人才，難怪連下屆特首誰人可入閘都咁費思量。