政情：尹德勝撐黃友嘉做局長
無論係前局長劉吳惠蘭（Rita），定係現任局長蘇錦樑（Greg），商務及經濟發展局局長呢個「三煞位」，似乎乜嘢人做都無乜起色，前者更捱到病離開官場。廠商會永遠名譽會長尹德勝話，呢個位一定要由商界人士出任，如果再由律師、公務員去做，好難做得好，佢更講到明，廠商會會長黃友嘉係人選之一。
屈指一算，黃友嘉年底就會卸任廠商會會長，再過半年後加入政府做局長就時間啱啱好，加上佢同政務司司長唐英年非常老友，假如唐唐真係做到特首，叫黃友嘉幫手做局長都唔出奇。尹德勝就話，黃友嘉呢類商界人士，如果有意做局長，肯定係商界之福，如果黃友嘉肯做，佢一定力撐咁話。
尹德勝又話，政府呢幾年搵律師、公務員去做商務及經濟發展局局長，注定失敗，因為佢哋完全唔知商界發生乜嘢事，好似早年金融海嘯時，Rita就只識擺官威，唔識點幫商界渡過難關，激死班商界。至於依家嘅Greg蘇，做人較劉太圓滑得多，但好似無乜成績，單單一條競爭法都爭取唔到商界支持，能力令人懷疑喎。