中環耳目：黃家和破戒歎冠軍炆豬肉
客家炆豬肉，係客家菜中嘅主角，早前力壓多間新界食肆奪得「冠軍炆豬肉」嘅彩福企業集團，炆豬肉確係有一手，連戒緊口嘅餐飲聯業協會會長黃家和（Simon）都要走去試菜，獲集團董事長何志強（強哥）及細佬何惠雄親自招呼。原來彩福嘅招牌炆豬肉，成功關鍵，在於一味鹹菜。
選用客家鹹菜
強哥從事大廚逾三十年，曾任職多間五星級酒店，堪稱廚神，佢發現坊間炆豬肉比較多用潮州鹹菜，味道帶酸。佢於是四出尋訪，發現大埔有個街市內一間雜貨店，出售不可多得嘅正宗客家鹹菜，味道濃而不酸，用來炆豬肉，齒頰留味，仲喺去年「香港客家文化節」炆豬肉比賽中勝出，獲最高榮譽金獎。
炆豬肉咁正斗，Simon第一時間試味，佢話五花腩肥瘦度適中，充分吸收鹹菜及配料香味，入口即溶。本來Simon立下戒條，規定只食一舊炆豬肉，但最後破戒食咗六舊。