政情：梁太四招「功夫」打天下
恒生銀行副董事長兼行政總裁梁高美懿，啱啱攞咗傑出專業女性大獎，風頭一時無兩。佢日前去咗青少年軍事夏令營，借四招功夫，分享成功之道。
佢話年輕人最緊要練成羅漢拳同鐵頭功兩招，話八十、九十後面對住全球競爭，好應該增值自己，亦都要學識同人合作，對唔同意見持開放態度。
梁太教嘅第三招係內功心法。佢話年輕人做事要用心，唔好得過且過，又話做嘢要有決心。佢話八五年上司問佢想唔想去澳洲拓展銀行業務，當時佢都有猶疑過，覺得唔應該丟低兩個女，但之後下定決心帶埋兩個女去澳洲，先至有今日嘅成就。最後一招就係大力金剛腿，梁太呼籲年輕人要喺逆境中搵出路，又話世上無難事，只怕有心人喎。
梁太七八年入滙豐做實習生，奮鬥咗三十幾年，終於成為恒生第一位女行政總裁，名副其實由低做起。