政情：陳克勤訪川孤兒院體會深
立法會議員陳克勤雖然仲未結婚，但佢原來好鍾意小朋友，早幾日佢率領八十幾個中學同埋大學嘅學生到四川探訪，一行人仲探訪埋當地孤兒院添，過程中遇到唔少感人事，搞到佢內心戚戚然。
了解地震重建進展
克勤仔今年已經係連續第六年返內地探訪，今次選擇四川，好大程度上係希望睇睇當地大地震後重建工程進展，同埋了解一下當地居民生活。旅程中，克勤仔去咗當地孤兒院探望小朋友，據佢了解，大部分被遺棄嘅孤兒都係因為身體有缺陷，一出生就被父母遺棄，認真慘情。
佢仲話，有一個小朋友令佢印象好深，當日去到孤兒院，嗰位小朋友坐住三輪車去到佢面前，大家一見如故，抱走佢時先發現，呢位小朋友天生冇咗一隻腳掌，所以根本唔可以自行步行。克勤仔話，呢位小朋友冇因為自己有缺陷而唔開心，反而成日笑，令到佢好感動，到離開時彼此都好唔捨得對方，克勤仔講明嚟緊會花多啲精神留意呢方面嘅慈善工作，希望有機會可以幫到佢哋。