沙角街多違泊警方漠視
沙田沙角街違泊嚴重，警方被指疏於執法！謝先生指最近發現由乙明邨外至沙角邨熟食檔一帶的沙角街，每逢入黑後便有車輛違泊，包括旅遊巴士、重型貨車及貨櫃車等，有時甚至有車輛停泊在巴士站內。「我之前去田心警署報案，個警察淨係叫我影低相，再寫信投訴，直情唔想理！」
警方發言人表示，田心警署一向重視區內違例泊車問題，亦知悉該處有違例泊車情況。警方曾於上址一帶發出八十七張定額罰款告票檢控違例停泊車輛。就近日巡查所見，違例停泊車輛數目明顯減少，反映檢控行動已見成效。
「嗰度直情係違泊黑點，尤其係熟食檔出面，警方根本就係執法不力，離晒譜！」沙田區區議員楊倩紅狠批警方漠視違泊問題，對市民之投訴亦不「上心」，促正視問題。