政情:金勞詹大爆唐唐婚外情

政界人物嘅感情生活一直十分神秘,鏡花水月嘅往事更加係無從稽查,金融服務界議員詹培忠(金勞詹)出名語出驚人,佢尋日同傳媒天南地北時突然主動爆大鑊,話自己當面問過政務司司長唐英年有婚外情嘅傳聞,唐唐嘅回應係「過去式」,即係認咗曾經有外遇喇。咁爆嘅消息,究竟是真是假,真係只有當事人同佢嘅親信先至有可能知喇!

政務司司長(CS)喺政府架構中屬於第二把手,負責統籌涉及跨部門政策工作,唐唐未做CS之前,曾經喺商界打滾多年,有唐少之稱,喺九十年代初立法局又做過議員,之後由民間跳入官場,加入政府成為工商及科技局局長,然後拾級而上成為財政司司長,於○七年更位居CS至今,成為政府「冧巴吐」,期間遇到嘅美貌與智慧並重嘅女性,自然多不勝數。

本來呢個都並非千奇百怪嘅事,奇就奇在一早跳出來講明「挺唐」嘅金勞詹突然爆料話,佢自己早前好八卦咁當面問過唐唐,話之前傳過佢有婚外情,唐唐當時話係「過去式」,即係幫唐唐手拆彈,為佢日後選舉掃除障礙嘅味道甚濃。究竟事件女主角係邊個,究竟係單數定係眾數等等,金勞詹起初都笑笑口,耍晒太極,話明白佢講咩嘅人就會明,再畀大家追問多幾次,佢跟手就好似為自己個嘴封咗膠紙咁,只係不斷話係「過去式,無嘢補充」,無講明佢個「過去式」所指嘅係咩嘢,更加令到成件事變得諱莫如深,極度撲朔迷離。

袁莎妮最常被討論

其實要數同唐唐投契嘅女性真係好多,但坊間討論得最多嘅係前運輸及房屋局副秘書長袁莎妮(Shirley)。眾所周知,唐唐同Shirley過去一直合作無間,由唐唐擔任工商及科技局局長後至成為財爺,都係Shirley做佢政務助理,佢係唐唐入官場後嘅盲公竹,甚至講到係唐唐愛將,直至後來唐唐升做CS後,Shirley先繼續自己嘅仕途,之後調任運輸及房屋局副秘書長,去年十月仲辭職離開政府,當時坊間都盛傳Shirley其實自我投閒置散,係準備幫唐唐助選,然而呢件事最近又峰迴路轉,Shirley最近走馬上任,成為香港總商會總裁。

究竟今次金勞詹爆單咁絕密嘅料,當中有幾多成真,有無正確引述唐唐嘅講法,可能只有佢哋兩個人知道,唐唐又啱啱開始放假,尋日無法向佢證實。不過新一屆特首選舉愈來愈近,會否有更多秘聞陸續引爆,大家就要拭目以待喇!

Money18免費即秒股票報價網站現推出8升級功能,財經資訊,實時實發!