公立醫院管理亂龍，鬧劇不斷，最新戲碼叫「抗疫功臣廢武功，救命機變催命符」，睇咗包你下次幫襯公院之前要諗過度過，可免則免。
兩年前豬流感襲港，疫情來勢洶洶，搞到人心惶惶，公立醫院引入俗稱人工心肺救命機嘅「體外膜氧合器」。呢種可以暫代心肺功能嘅設備，曾經成功救治咗多名患者，為對抗豬流感立下大功。
可惜，嚟到今時今日，呢個抗疫功臣隨時被廢武功，真係講都冇人信。事緣瑪麗醫院因為護士流失嚴重，近排將兩位熟悉救命機操作嘅護士調離深切治療部，其中一人可能不滿調職而即時劈炮，另一人就要求放假。
顧名思義，救命機梗係用嚟救命㗎啦，唔熟悉操作隨時搞出人命，唔通院方連咁簡單嘅道理都唔明？其實講來講去，又係管理不善、人手短缺所致。瑪麗醫院深切治療部係護士流失嘅重災區，舊年已經走咗十七人，嚴重影響服務質素。點知今年仲得人驚，上半年離職或者調職嘅護士已經有十人，包括被新任護士主管調走嘅兩位熟悉救命機操作護士。而同期新聘人手只得五個，走十個嚟五個，服務質素有冇受影響，畫公仔唔使畫出腸嘞啩。
搞到咁大鑊，院方循例否認有問題，話護士調職係「正常安排」，仲話會陸續增聘深切治療部護士喎。冇錯，有關調動可能屬於正常安排，弊在後果可能一啲都唔正常呢！正如護士組織話齋，近年各院ＩＣＵ因為護士人手不足，減開病床情況普遍，就算可以增聘護士，經驗流失無可彌補。萬一有護士因為經驗所限，操作救命機出錯，呢隻鑊邊個孭先？
係人都知，由於醫管局管理無方，醫療資源嚴重錯配，公立醫院「十個煲六個蓋」嘅情況相當普遍，搞到前線人員壓力爆煲，得閒死唔得閒病，醫生護士逃亡潮一浪接一浪，瑪麗醫院就曾經有外科護士集體請病假以示抗議。
弊在當局一於少理，每次出事只係頭痛醫頭，腳痛醫腳，拖得就拖。最離譜就係，當局冇面對現實解決人手荒，仲好高騖遠，拍晒心口話要發展乜嘢醫療產業喎。真係唔畀佢哋嚇死，都畀佢哋笑死！
功夫茶想問吓，淨係內地孕婦湧港產子，已經搞到雞毛鴨血，如果再起多幾間私家醫院，醫護人員喺邊度嚟？除咗向公立醫院挖角，唔通仲可以喺石頭爆出嚟？唔該高官下次吹水之前用個腦諗吓先喇！