政情：郭少明姚君達爭相開舖
扮靚美容係女人嘅終身事業，難怪美容生意水漲船高，加上內地個人遊登陸台灣，大家都預料到商機無限。「莎莎」老闆郭少明睇準時機，早就快人一步登陸台灣插旗，至今成個台灣有廿二間舖，所以經常要飛過去開會。雖然郭老闆生意咁忙，但每逢賽馬日，尤其係愛駒出賽，就算佢身在外地都會特登坐飛機趕返香港觀戰。
不過，郭老闆痛錫愛駒之餘，對家庭一樣咁照顧，嚟緊佢會同家人出發去英國、俄羅斯及莫斯科度假。除咗莎莎拓展業務外，米蘭站主席姚君達都努力搵新舖，但佢目標唔係台灣，而係北京同上海，佢希望今年開到六間舖，好彩內地嘅舖租未及香港咁貴，所以靚舖位易搵好多。
講開又講，原來德國寶董事長陳國民都係莎莎嘅熟客，佢話每日都會塗潤膚露補濕，連帶太太同女兒都有幫襯，陳國民話，佢同郭少明係生意拍檔，買護膚品唔幫襯番老友又點得呀。