政情：拆僭建重皮 煲呔曾肉赤

下屬極速清拆

當日煲呔曾被本報踢爆佢祖屋違例僭建後，佢起初都想側側膊唔多覺，但其後屋宇署向佢發出勸喻信後，佢先至認衰話會委託認可人士跟進及清拆。不過，直到近日我哋到現場視察，其僭建物依然原封不動，外牆亦冇搭到棚架，絲毫沒有動工迹象。相反其他同樣被揭發有僭建物嘅問責高官，都已迅速清拆僭建物，避免拖垮政府威信，點知作為老闆嘅煲呔曾就闊佬懶理。

有知情人士透露，話煲呔曾最近同人呻，話清拆祖屋僭建物費用要花兩個月人工，即刻慘叫「好傷」，如果以煲呔曾月薪三十五萬元計算，即係要成七十萬元先可以埋單。有人話，七十萬元聽落有啲貴，質疑煲呔曾係咪焗住被人當老襯咁㩒。又有人估計，搭棚都要十幾萬，加埋清拆後嘅內部裝修及清泥頭，計落都要幾十萬元。至於煲呔曾有冇報大數，咁就佢至知喇。

如果呢個講法屬實，充分反映煲呔曾視錢財如命，但就視民望如浮雲。港大最新民調顯示民生不滿比率創出十九年來嘅新高，但佢睇錢仲緊張過民生同民望，名副其實係佢口中「做好呢份工」嘅心態。正所謂上樑不正下樑歪，有啲咁嘅上司，下屬自然Hea住做，好似前日立法會答問大會，行政會議成員上演「大難臨頭各自飛」，懶得去撐場。

煲呔曾知法犯法僭建，為咗釋公眾疑慮，多多清拆費都要畀，莫講話嗰區區七十萬元。如果佢繼續視錢財如命，不如提早引咎辭職，返屋企攬住啲錢過世好過。煲呔曾呢個故事，就令人想起電影情節，故事講述一啲心術不正嘅人去盜寶，最後為咗寶物連命都唔要，實在可悲。