中環出更：吳守基法國睇內衣騷取經
今個馬季收爐後，好多城中名人都外遊輕鬆吓，好似前仁濟醫院主席吳守基都話會去法國一趟，而且仲係去睇內衣騷添！原來吳守基係為咗家族內衣生意過去睇騷取經，佢話從事內衣生意已經好多年，相當專業。卓妮問佢嘅功力係咪可以用肉眼望吓就知女士嘅內衣尺碼，佢就怕醜臉紅紅話：「咁又冇咁犀利！」咁又係，依家啲內衣設計咁神奇，實在好難估得中。
現今女士們為表現完美體態，逐漸注重「內在美」要配搭得宜，而且仲關注內衣穿着不當會影響身體健康。吳守基話，依家內地女士對內衣開始好講究，所以佢會研究吓點樣開拓內地內衣市場，佢又話今次過法國睇吓有冇新款式。不過，佢最怕坐長途飛機，事關以前坐得太多，所以依家一年坐一、兩次就夠皮，但係為咗工作，就冇辦法喇。