政情：馬場名人談iBond耍晒手

「海王子」偷吻梁孔德

趁抖暑前，馬迷蜂擁入場。政商界名人都三五成群湊熱鬧。梁太老公先拔頭籌，愛駒「皇仁勁駒」喺第二場以半冷姿態奪冠，獎金逾三十六萬元，梁太同媽媽high到拍爛手掌。高溫炎夏，梁太話暑期唔願出門，涼啲再算。

轉過頭，幸運之神降臨喺梁孔德身上，匹團體馬「海王子」勝出第六場。拉頭馬之際，馬匹忽然fing頭，錫咗主人梁孔德一啖，認真鬼馬。有大筆獎在手，梁生話未知點慶祝，暑假安排英超來港，周身唔得閒。

煞科日贏馬嘅，仲有仁濟總理王賢訊（Vincent），良駒「安瑪」今季首次進身三甲，跑第三名。獎金雖然只得七萬多，但Vincent話已經心滿意足嘞。等多兩個月，佢榮升做老竇，初為人父，心情既興奮又十分期待。

唔少馬主今季大豐收，咁馬迷又點呢？前冠軍練馬師簡炳墀就話「普普通通」。佢自嘲注碼唔多，上落只係千幾蚊。政府推出嘅iBond今日公開認購，簡Sir懶得望多兩眼，聲言「買滙豐好過」，事關每隔幾個月有息收，好過買iBond多多聲。政府施政失民心，簡Sir都睇唔過眼：「叫政府唔好搞咁多無謂嘢，亂派六千蚊，不如集中資源，搞好醫療同長者福利好過嘞。」

東華總理王賢誌（Vincy）都對iBond耍手擰頭：「唔買，因為我唔識！」Vincy仲幽政府一默話：「政府派嗰六千蚊我都未收到，仲發iBond問我攞錢？有無搞錯呀！」

講番煞科，曾喺○七至○八年度奪香港馬王嘅「好爸爸」，尋日舉行榮休歡送儀式，亮相馬圈同馬迷say goodbye！

王賢誌話唔認識iBond係乜東東，唔會認購。

老公拉頭馬，梁高美懿（右）開心到笑不攏嘴。 （徐家浩攝）

卓妮