工聯會四大巨頭包括會長鄭耀棠及三位副會長，明日會啟程到北京拜訪唔同嘅單位，包括國務院港澳辦。棠哥講到明乜嘢議題都會傾，仲話唔怕被人話佢打「小報告」，事關佢哋今次係打「大報告」，包括反映港人對內地食品安全嘅憂慮同關注，以及立法會替補機制引發嘅問題。夕陽政府民望跌到落谷底，今次連身兼行政會議成員嘅棠哥都上京「篤背脊」，睇嚟煲呔曾班子都好難度過餘下任期。
