政情:葉偉明自願供款呻笨

強積金實施咁多年,就畀人鬧足咁多年,最過分政府竟然話呢個制度有效,可以保障到打工仔退休生活,認真厚顏無恥。唔好睇一班以爭取勞工權益同福利嘅立法會議員平時聲大大鬧政府,原來對住強積金一樣冇晒符,事關佢哋盡責任自願供款後,竟然連稅都冇得扣。

講緊嘅其實係幾位工聯會立法會議員,除咗仲做緊聯合醫院精神科顧問醫生嘅潘佩璆外,其餘三位都有強積金自願供款。不過,有供款嘅勞工界葉偉明發現,原來供款之後,其實連稅都冇得扣,佢打去稅局查問,對方話佢哋做議員,並唔屬於自僱人士,同立法會又冇僱傭關係喎,所以咪冇得扣囉。

葉偉明仲話,做立法會議員有約滿酬金,所以係唔需要供強積金嘅,但佢哋幾個覺得既然條強積金法例喺度,咁咪即管供款囉,當係儲錢都好,等將來有個保障嘛,誰不知原來立法會議員性質咁怪,既非自僱又非受聘,為咗大圍福利,佢考慮寫信畀立法會行管會反映吓喎!

Money18免費即秒股票報價網站現推出8升級功能,財經資訊,實時實發!