政情：方志偉劈炮總商會
商界一直流傳香港總商會總裁方志偉劈炮唔撈，總商會尋日就正式宣布，做咗五年嘅方志偉做到年底就正式離職。聽聞方志偉合約明年先至到期，但佢話同主席胡定旭講，希望提前解約，肥胡覺得，既然方志偉個心都唔喺總商會，所以提早放人。方志偉做過官、又撈過總商會，聽聞佢已另有高就。
有總商會中人話，呢次分手原來係不歡而散。其中一個原因係「珠玉在前」，如果大家仲記得，前總裁翁以登在位時，表現深得總商會上下賞識，又係傳媒之友，擦靚總商會個招牌，方志偉接手後，表現未見突出，所以咪比下去囉。有人話總商會今回設法逼走方志偉，但「替補」人選就未有定案。方志偉尋日未有回覆本報查詢。
雖然有傳肥胡同方志偉唔咬弦，但尋日總商會嘅新聞稿相當客氣，方志偉話，佢能擔任總商會總裁感萬分榮幸，而肥胡就話，方志偉為總商會奉獻佢喺公共政策、經濟及貿易投資方面嘅豐富經驗同專業知識，對總商會的政策發展貢獻良多。大家互讚一番，總叫做好頭好尾。