銀行寄錯信 投訴無改善
銀行掌握客戶大部分個人資料，處理相關資料務必謹慎。已遷入紅磡兩年的卞先生乃單位的第一手業主，最近一年經常接獲恒生銀行發出的信用卡月結單，但收件人卻為日籍人士，「我屋企都冇呢個人，彈過信、投訴過都仲寄嚟，銀行有個客嘅聯絡方法，點解仲會錯？」
被批行政效率低
恒生銀行發言人承認，五月初曾接獲卞的反映，已即時聯絡該客戶跟進及更正有關紀錄，並就事件引起卞之不便致歉。發言人又稱，信用卡中心接獲退回郵件後，一般會聯絡相關客戶核對及更新地址。
不過，卞指至今仍間中接獲相同之錯誤信件，質疑銀行行政效率欠奉。
有業內人士估計，有關情況或與更改地址程序有關。據了解，有關銀行現時規定，客戶開立新戶口時必須提供有效住址證明，但更改地址則毋須提供住址證明，只需填妥表格及新地址等資料，簽署作實即可更改。「改地址嗰陣冇文件對，個客又可能寫錯，銀行就唔會知個地址有錯。再唔係職員錯手入錯資料，喺呢兩方面入手應該可以改善到。」