曾班子喺投放科研一向為人詬病，呢個問題唔係新鮮事物。呢十年，無論落咗任或者現任大學校長，全部都曾經發炮炮轟政府忽視科研、創新科技，但政府依然係職業性失聰聽唔到。早排教資會仲將個沿用已久嘅研究用途撥款，大改玩法，將部分撥款要八大院校「爭餐死」先至可以攞到錢做研究，呢啲咁嘅手段係幫到科研定係害咗科研，一睇就知。
但鬍鬚曾又何解無端端走出嚟認衰？立法會後日將會動議辯論搞個創新及科技局，提出要有專責部門統籌創新科技策略，鬍鬚曾惟有寫定個官方說法出嚟，等啱啱上任嘅商務及經濟發展局局長蘇錦樑可以睇住個「官方答案」嚟照抄，等佢唔使講錯嘢累街坊。不過科技研發係長遠嘅，知衰臨急抱佛腳寫篇網誌，又有乜嘢用？