政情：黃碧雲向梁美芬宣戰
今明兩年都係選舉年，唔少社會議題都可以變成選舉議題。打算去九龍城區議會黃埔東選區挑戰現任區議員梁美芬嘅白鴿黨黃碧雲，尋日就二話不說踩入選區，以立法會空缺替補機制為議題，好唔客氣咁叫班街坊要對梁美芬提出質疑，佢仲向梁美芬下戰書，話要同對方喺區內舉行街頭辯論。
黃碧雲喺一班黨高層支持下去黃埔花園踩場，話梁美芬喺政府提出替補機制時一聲不響，冇叫政府做諮詢，亦冇落區諮詢街坊。佢仲話「梁美芬係博士，我都係政治學博士，依家就博士對博士、學者對學者、專業對專業，七月十三日（立法會恢復二讀草案）之前同佢喺度公開辯論。」梁美芬冇喺區內「恭候」踩場嘅人，兩人亦無巧遇。
梁美芬事後只係發咗一份公開聲明，心平氣和咁話佢會同專業會議成員傾吓投票立場，仍然希望政府重新考慮佢原先提出嘅方案，就係辭職議員不可再參選。聲明裏面，隻字不提今日發生嘅踩場事件。