政情：記者團體角色混淆招嫌疑
早幾日有示威者喺七一遊行之後堵塞馬路抗爭，大批記者為咗採訪都留守到尾，直到警方完全清場。但係香港警察唔理三七二十一，連電視台同網台「青台」嘅記者都捉埋，認真亂嚟。有記者團體尋日開腔批評，話警方做法唔可以接受，要求負責人公開解釋。
一個記者團體尋日話，警方冇理由拘捕記者，即使記者當時唔可以提供證件證明身份，但事後所屬公司已經證明被扣留記者嘅身份，但警方仍然一直扣留該名涉事記者，點講都講唔通。佢哋仲話，根據警務通則，警員有責任協助記者合法採訪，只不過依家警方對示威者同記者都愈來愈唔耐煩，情況令人憂慮。不過話時話，該記者團體都組織咗隊伍遊行，所以角色本身就係混淆不清，佢批評警方，其實都係五十步笑百步喇。
有團體角色混淆，政府做嘢亦係亂晒龍，政府近年有嘢公布，多數係鬼祟開吹風會而唔開記者會，呢個做法，尋日繼續畀記者團體批評。