政情：陳幼南食雞魚救地球
唔少人都知，食肉會製造廢氣，加速溫室效應，所以為咗環保最好食素。但係如果戒唔到口，大家又知唔知食少啲豬肉、牛肉，多食雞肉及魚肉，都可以為地球盡一分力？
潮州商會會長陳幼南嘅家族生意喺飼料業界享負盛名，佢爸爸陳偉南有香港「飼料大王」嘅稱號，難怪日前我哋同陳幼南傾閒偈，佢有感而發用飼料嘅角度提出呢個新嘅環保主張。
佢話餵唔同嘅家畜或家禽食飼料，以同樣要長一斤肉嚟計，雞最抵諗，只要一斤飼料就可以長一斤雞肉，魚就要一斤半，豬同牛最「大食」，要五斤咁多飼料至長一斤肉，所以為咗環保着想，大家梗要食多啲雞同魚。
點解陳幼南諗嘢咁有條理？因為佢係個百分百學者囉！佢係美國普林斯頓大學嘅化工博士，未返香港幫手前，曾經喺美國國家研究所做研究，又喺加拿大蜆殼石油公司做石油提煉研究。佢接手咁傳統嘅家族生意後，引入好多高科技理念，又喺廣州擴展飼養種雞場等生意，甚至投資加拿大石油業，係咪睇唔出佢周身刀呢？