政情：社民連聲勢被淹沒

究竟示威者堵塞馬路做法啱唔啱，呢個問題至今喺社會上仍然有好多爭議，不過如果抽離去睇，人民力量當日嘅動員同安排，確係好有計劃。人民力量當晚七點幾已經喺灣仔修頓球場集結，當時遊行仲未結束，佢哋選呢個地點，唔係無緣無故嘅，原來佢哋睇中咗呢個地點有洗手間又有食肆，閒閒哋逗留幾粒鐘都絕對無問題；人民力量喺出發繼續前仲特意安排婦孺提早離開，以免招人口實。

到咗晚上十點幾，人民力量過千人開始操去中環，由於有足夠休息同食物，成隊人都冇乜疲態，而為免被警方無端截龍減低力量，行頭嘅一直小心翼翼，一見警方想截龍，即時停步兼褪後，總之一團人一直緊緊聚集不被警方分開，結果警方全晚都唔能夠成功將佢哋截開。人民力量嘅示威者當晚不時坐低同警方對峙，喺有足夠休息下，結果可以同警方玩到凌晨兩點幾。

領導層隱形

係人都知道，人民力量基本上都係由社民連分裂而成，經過今次考驗，就發現社民連聲勢已經大為減弱，當晚所見，佢哋整晚嘅抗爭活動其實都唔係由黨領導層做主導，反而係由佢哋嘅友好團體、即係一班八十後社運青年話事。就現場所見，真真正正屬於社民連嘅成員真係未必夠一百個，力量同聲勢差咗係不爭嘅事實，如果真係要將社民連同人民力量當晚表現比較嘅話，社民連實在係輸晒。

即使唔講組織同動員，淨係講籌款，社民連七一遊行當日同樣輸晒畀人民力量，黨主席陶君行透露，社民連全日籌到廿幾萬，至於人民力量方面，發起人黃毓民就話佢哋籌到四十五萬。各方面都輸畀人民力量，社民連前路真茫茫，睇嚟佢哋真係要諗諗，否則喺呢個波濤洶湧嘅政壇，真係好易畀人淹沒。