中環出更：郭少明風水屋 升值三倍
莎莎主席郭少明嘅化妝品零售生意愈做愈旺，旗下多匹愛駒亦愈戰愈勇，帶挈佢同家人拉頭馬拉到手軟，認真鴻運當頭，唔知同佢位於香島道嘅風水屋有冇關係呢？講起佢間豪宅，郭少明自爆，佢間屋喺九六年買時唔使五千萬元，現已升值至兩億元。十五年間價錢勁增三倍，認真和味。
郭少明依家住緊嘅香島道大宅，擁有四千呎樓面面積同埋一千呎花園，非常舒適，又夠氣派，當年買時唔使五千萬元，最近佢獲悉市價已升上兩億元，升值率驚人，難怪佢愛上長揸物業，事關財富暴增完全不費吹灰之力。兩、三年前，佢再大手筆買入淺水灣道物業，佢笑稱升值亦都好唔錯。
買磚頭長揸
依家佢一有閒錢繼續買磚頭，無論係住宅定係商業大廈，佢深信長遠一定會增值，仲笑稱驚遲啲買唔到添！不過佢唔會短炒，買咗就擺喺度，一來可以坐享升值，二來可以留畀仔女，果然係個廿四孝老竇。