中環出更：六叔伉儷商場「慢」步
步入暮年，一樣可以拍拖。TVB副主席兼董事總經理方逸華（六嬸）同已經一百零三歲嘅邵逸夫（六叔）前日下晝七點左右現身中環ifc，六嬸仲童心未泯食雪糕。佢哋一行人一共有五個人，不知幾悠閒。
一行五人有陣勢
長者一樣可以拍拖，且早已超越咗兩個人手拖手喁喁細語嘅層次。卓妮見到六嬸攞住杯雪糕，一行五人好有陣勢咁喺商場慢慢行，但見六叔坐喺輪椅上，頭戴冷帽，下半身冚住毛氈，所以都幾矚目。大家行咗一陣，就喺商場一間咖啡店嘅梳化坐低休息，此時六嬸攞出佢嗰杯自攜嘅雪糕慢慢歎。其他人唔阻佢哋二人世界，坐喺後面張枱，點咗啲蛋糕同飲品，但係六叔六嬸就無落柯打叫嘢食，事關六嬸有私伙，佢食完雪糕仲拎咗壺飲品出嚟飲，好滋陰，六叔就無食嘢。
六嬸齋睇冇斬獲
休息咗一陣，大家又繼續行街，工人推住六叔一馬當先喺前面行，但係速度就好慢，方便六嬸喺後面慢慢Window shopping。前排六嬸痛風症發作，搞到佢以主人家身份出席「邵逸夫獎」發布會痛到「殊殊」聲，上落樓梯同去洗手間時要人扶住，但係前晚見佢步履輕盈，痛風睇嚟已經好番。
心情靚靚嘅六嬸，間間舖頭都望下睇下，對ARTE嘅珠寶尤其有興趣，企喺門口望咗好耐，售貨員見貴客臨門，馬上走出嚟招呼介紹，不過六嬸唔知係咪怕六叔等，同售貨員傾咗兩句，望下就算，無花時間入內慢慢揀，滿足完視覺享受，六嬸就快步行番上去跟返六叔個Beat，恩愛盡在不言中。
卓妮