中環出更：朱繼陶鄭錦鐘雙雙拉頭馬
今個馬季將近煞科，尋日沙田馬場好熱鬧，淨係盃賽就有三個，好多名人馬主趁馬季下周日收鑼前入場盡情玩樂。太子珠寶鐘錶執董朱繼陶（Joseph）同保良局副主席鄭錦鐘（Eric）都時來運到雙雙拉頭馬，兩人都有十幾二十人一齊拉頭馬，陣容相當龐大，眾人開心到不得了。
阿仔掌舵 王國強輕鬆
Joseph有份嘅團體馬「天賜福星」奪冠，為團體一眾馬主贏得四十八萬獎金。Joseph話，初初以為匹馬最多跑第二、三，估唔到咁生性勝出，成班老友都好意外。有份養馬嘅前鐘錶業總會主席黃業光都現身拉頭馬，加埋其他馬主朋友子女由外地返港度假，所以先出現咁熱鬧嘅拉頭馬鏡頭。
Eric尋日都相當風騷，事關佢嘅愛駒「享耆成」威風跑出，雖然佢話只係投注咗一千元，派彩有限，但馬匹獎金就高達三十六萬元，算係標番個尾會，亦對入場捧場嘅朋友有個交代喇。Eric話，佢已約埋幾位好朋友尋晚去西九龍環球貿易廣場間「龍璽」酒家食中菜慶祝。
廣東社團總會會長王國強（KK）都現身馬場主持廣東社團盃賽，佢自爆九月一日又冧莊做多一屆，所以嚟緊三年有排忙。KK笑稱，依家「冇眼睇」自己間公司金城營造，好彩阿仔已經上晒手，員工又好幫得手，佢一星期只係返一次公司開會，睇吓有冇投訴或者安全問題，難怪佢同爸爸王錦輝咁熱心服務社會，尋日朝仲孖住去參加酒會添！
卓妮