今明兩年係選舉年，各黨派嘅立法會議員不時爭取傳媒曝光，聲大夾惡狠批夕陽政府拙劣施政自然係理所當然，但一遇到未必有太多人關注嘅議題，議員愛理唔理嘅真面目就即刻原形畢露。話說立法會尋日晨早九點續會，隨即就泛民主派提出嘅《通訊事務管理局條例》修正案投票，唔知係唔係太早嘅關係，連身兼行政會議成員嘅民建聯劉江華都罕有咁失威，需要向立法會主席查詢當時投票緊乜嘢修訂。
Hea住開會嘅議員多，尋日仲有人投錯票添，話說有議員喺三讀《通訊事務管理局條例》投票時「呱呱叫」，向主席報告懷疑自己投錯咗反對票，好彩結果仲未顯示出嚟，佢趕得切更正。今次就話突然發現自己㩒錯掣啫，唔發現咪成為立法會投票紀錄囉。立法會早開工，好多時出席議員唔夠法定人數，就算夠，啲議員又亂投票。佢哋鬧官員就好叻，不如檢討吓自己喇。