政情：飯盒會召集人後繼無人？
前立法會議員張超雄退出公民黨後，一直搵緊其他有工會背景同立場草根嘅單丁泛民議員合組工黨，但反應一直麻麻。據聞工黨嘅籌組工作最近終於取得進展，有望喺短期內宣布成立，並搵到公民起動嘅何秀蘭加盟。
人選少之又少
若然何秀蘭最後真係籌組工黨，泛民飯盒會召集人就可能要再度換人。因為泛民內部不成文規定，飯盒會召集人應由盡量中立同冇黨派利益嘅人、尤其係不應由大黨成員出任。之前原屬前綫嘅劉慧卿加盟民主黨，佢就好識做自行退位，何秀蘭先有機會上位。
至於由咩人接任，泛民中人都話好頭痕，因為經過多次黨派整合，剩低嘅一人黨或獨立泛民議員已經少之又少。其中職工盟李卓人身兼支聯會主席，好難再分身；街工梁耀忠成日唔開會；民協馮檢基同部分黨派有牙齒印；社福界張國柱就唔夠資深；至於衞生服務界李國麟，更唔知仲算唔算係泛民，最後可能破例畀何秀蘭繼續做。