中環出更：黃進達做司儀夠淡定
汕頭商會前晚就職，祖籍潮陽嘅康泰旅行社董事總經理黃進達（Jason）擔任司儀，見佢喺台上面表現淡定，連螺絲都無食到一粒，好流暢，不過話晒台上一分鐘，台下十年功，Jason為咗做好司儀，事前都準備咗一個星期，又要睇稿又要綵排，絕對唔係打天才波。
謝廷駿獲勳章好應該
要勤勤力力做好準備工夫嘅道理，放喺讀書方面都係一樣，尋日就係高考放榜，畢業於理工大學旅遊系嘅Jason，當年都經歷過高考放榜嘅緊張，所以佢勸勉各位預科生，考得好固然開心，就算失咗手都唔好放棄，再接再厲，畢竟考試只係一生其中一個考驗而已。
講開考驗，Jason上年接過公司大旗無耐，就發生菲律賓事件，今日領隊謝廷駿（Masa）獲追頒金英勇勳章，Jason覺得好應該，因為Masa好盡心盡力，好應該得到呢個勳章，當然唔開心嘅嘢，就唔好再發生啦！